Máis de 80 artistas participan este sábado en Sigüeiro no espectáculo “Endaterra”, da A.C. Xacarandaina
A montaxe mistura distintas artes escénicas como o baile galego, o teatro e as
artes visuais
O alcalde, Luis Rey, destaca que “a falta de tres días xa só quedan un 30% das
invitacións, que poden retirarse no Centro Deportivo”
O pavillón polideportivo Juanito Amigo de Sigüeiro
acollerá este sábado, a partir das 21.30 horas, a representación da espectacular
montaxe musical e teatral “Endaterra”, da Asociación Cultural Xacarandaina, dentro
da súa xira por concellos do Camiño Inglés e do Camiño a Fisterra.
“Endaterra” é un espectáculo de música e baile tradicional para todos os públicos que
mistura distintas artes escénicas como o baile galego, o teatro e as artes visuais a
través de imaxes e sons do Camiño de Santiago. Durante a súa representación, a
Asociación Cultural Xacarandaina contará a historia da peregrinación levada a cabo
no ano 1900 por unha aristócrata inglesa e máis a súa doncela desde Londres ata
Santiago de Compostela, rematando en Fisterra e Muxía.
O alcalde, Luis Rey, destaca que “o espectáculo Endaterra está a xerar grande
expectación entre a veciñanza, tal e como demostra o feito de que a falta de tres días
xa só quedan un 30% das invitacións, que poden retirarse no Centro Deportivo, cun
máximo de dúas invitacións por persoa”.
Esta montaxe, dirixida polo coreógrafo Henrique Peón, contará con máis de 80 artistas
sobre o escenario repartidos entre o corpo de baile, as pandereteiras, o grupo de
gaitas e os coros.
Outono cultural
Por outra banda, dentro da programación do Outono Cultural de Oroso, este venres
están previstos senllos pases do espectáculo para bebés “Na casa”, de Caramuxo
Teatro, ás 18.00 e ás 19.00 horas, no Centro Cultural. A asistencia a esta actividade é
gratuíta, pero é preciso inscribirse no teléfono 981 690 903. Xa na xornada do sábado,
ás 11.30 horas está programada a obra “Ás para Álex”, de Baboab Teatro.
