O Concello de Oroso programa sete actividades na “Semana Cultural” do 23 de agosto ao 8 de setembro
Unha excursión ao Aquapark de Cerceda para maiores de oito anos abrirá a programación lúdica o martes da vindeira semana
A Concellaría de Cultura de Oroso vén de programar un
total de sete actividades culturais e lúdicas no marco da “Semana Cultural 2022”, que
se desenvolverá desde o martes día 23 de agosto ata o xoves día 8 de setembro.
As actividades comezarán o vindeiro martes 23 de agosto cunha excursión ao
Aquapark de Cerceda dirixida a maiores de oito anos de idade. As prazas son limitadas
e o prazo de solicitude permanecerá aberto ata o venres 19 de agosto no Centro
Cultural.
Ao día seguinte, o mércores 24 de agosto, a explanada da piscina municipal acollerá o
espectáculo teatral para todos os públicos “A tropa do doutor milagre”, a cargo de
Urdime. Dous días máis tarde, o venres 26, a Praza de Isaac Díaz Pardo será o escenario
do espectáculo de música e movemento para todos os públicos “Pisando ovos – Give
it a Spain”, incluido no programa “Cultura no Camiño”. O martes 30 de agosto, Magín
Blanco ofrecerá o espectáculo musical “A banda das apertas” na explanada da
piscina, tamén ao abeiro de “Cultura no Camiño” e dirixido a todos os públicos.
Xa no mes de setembro, o venres 2 a Praza de Isaac Díaz Pardo acollerá a actuación
musical de Cora Velasco, incluida no programa “Cultura no Camiño”, mentres que o
martes 6 de setembro será Marta Alonso Tejada quen ofreza o espectáculo de danza e
humor “Sofá” na explanada da piscina. Por último, o xoves 8 de setembro, Urdime
programará a obra teatral “Muiñada”, para todos os públicos, no Parque do
Carboeiro.
