O Concello de Oroso informa do remate das obras de renovación do vial que comunica Oroso de Abaixo, na Gándara, co vial de acceso ao núcleo da Igrexa, en Deixebre
O Concello de Oroso informa aos seus veciños e veciñas do remate dunha actuación para renovar a rede viaria nas parroquias de Deixebre e A Gándara, mellorando a seguridade de vehículos e peóns.
En concreto, os traballos serviron para a renovación do camiño que discorre desde o lugar de Oroso de Abaixo (A Gándara) ata o vial de acceso ao núcleo da Igrexa (Deixebre). As obras tiveron un orzamento de 118.420 euros.
Este camiño estaba en mal estado e a actuación consistiu nunha pavimentación con rego asfáltico para conseguir unha capa de rodadura máis estable e segura, dando resposta ás demandas veciñais.
“A mobilidade nos camiños do rural é moi elevada, por iso desde o concello acometemos de forma continua proxectos de mellora da rede viaria, facilitando as comunicacións e reducindo o risco de accidentes”, asegura o concelleiro de Obras de Oroso, Luis Rey.