Oroso pecha a primeira semana solidaria xuntando arredor de 1.000 kgs. de alimentos non perecedoiros
O equipo formado por caras coñecidas da TVG impúxose por 9 a 3 ao conxunto dos políticos locais nun partido que congregou a unhas 200 persoas no pavillón
O Concello de Oroso pechou este mediodía a I Semana
Oroso Solidario coa disputa do partido benéfico de fútbol sala entre o equipo dos
políticos locais e o conxunto formado por caras coñecidas da TVG, que serviu para
reunir arredor de 1.000 quilogramos de alimentos non perecedoiros que en vindeiras
datas o Departamento de Servizos Sociais distribuirá a familias con escasos recursos.
O encontro, que congregou a unhas 200 persoas no pavillón de Sigüeiro e estivo
marcado polo bo humor, rematou cun resultado de 9 a 3 a favor do equipo das caras
coñecidas da TVG. Os goleadores foron Federico Pérez (3), Adrián Díaz (2), Terio
Carrera (2), Xosé A. Touriñán (1) e Fran Cañotas (1). Por parte dos políticos locais
marcaron Luis Rey, Fernando Gutiérrez e Jonatan Rey. Afortunadamente, non houbo
lesións e non foi necesaria a participación da fisioterapeuta Begoña Alonso Basalo,
que tamén colaborou solidariamente no evento.
Con anterioridade a este partido solidario, a I Semana Oroso Solidario axudou a
recadar fondos para a Asociación de Nenas e Nenos Oncolóxicos de Galicia cunha
Andaina Solidaria o pasado domingo; o martes celebrouse unha charla do xornalista
Alfonso Pérez e do produtor de televisión Ramón Castaño sobre a súa viaxe a Polonia
para traer a España mulleres refuxiadas ucraínas; o xoves promoveuse a doazón de
sangue na unidade móbil da Axencia de Doazón de Órganos e Sangue; e o venres
recolléronse bicicletas usadas para o colectivo Recyling, que se encarga de arranxalas
e distribuílas a familias necesitadas e tamén envialas a países africanos.
