O Concello de Oroso reanuda as obras de reforma do Centro Cultural, que se inaugurará en outubro
O alcalde, Luis Rey, acudiu esta mañá a supervisar o comezo dos traballos
acompañado por responsables da UTE adxudicataria, formada por Citanias e
Grupo Mariño
O proxecto, que supón un investimento de 444.456,29 euros, inclúe a construción
dun auditorio cun aforo de 190 prazas, a ampliación da biblioteca e unha sala de
usos múltiples
O alcalde de Oroso visitou esta mañá o Centro Cultural
Fernando de Casas e Novoa para supervisar a reanudación das obras de reforma e
ampliación por parte da UTE adxudicataria, conformada polas construtoras Citanias
Obras y Servicios e Grupo Mariño Obras y Servicios, que dispón dun prazo de tres meses
para completar os traballos.
Esta actuación, que suporá un investimento de 444.456,29 euros, inclúe a construción
e o equipamento dun auditorio cun aforo de 190 prazas, o acondicionamento dunha
sala de usos múltiples e a ampliación da biblioteca, que pasará a contar cunha zona
nova de acceso automatizado para que poida estar operativa as 24 horas do día os 365
días do ano.
O alcalde agradeceu o labor de todos os membros do goberno e dos técnicos
municipais que traballaron para permitir “desatascar unha obra que estivo moitos
meses paralizada debido a situacións relacionadas coas anteriores construtoras
adxudicatarias e completamente alleas ao concello”. “Nos tempos que corren,
primeiro coa pandemia e agora debido á invasión de Ucraína, é habitual que xurdan
problemas na execución das obras e o importante é que fomos quen de solucionalos
para que a veciñanza poida gozar moi pronto dunha infraestrutura cultural de
primeiro nivel”, apuntou Luis Rey.
Ao respecto, o alcalde salientou que a citada demora na execución das obras debido
a circunstancias alleas “non afectou nin alterou o desenvolvemento da programación
cultural habitual, xa que a Concellaría de Cultura seguiu desenvolvemento a súa
actividade con normalidade”. “Tamén é evidente que cando dispoñamos do novo
auditorio teremos máis capacidade para coordinar unha programación cultural
complementaria e máis ambiciosa, que nos permita sacarlle o máximo proveito a esta
nova infraestrutura”, apuntou Luis Rey.