Dúas brigadas con 22 voluntarios de Oroso retiran tres camións cheos de lixo dos camiños orosáns na primeira xornada dos “Días Verdes”
Este venres dedicaranse á eliminación de puntos de verquido incontrolado de lixo.
Un total de 22 veciños e veciñas de Oroso, divididos en dúas brigadas, participaron durante esta mañá na primeira xornada do programa “Días Verdes”, unha iniciativa posta en marcha polo Concello de Oroso para adecentar o municipio e concienciar á veciñanza da necesidade de preservar a nosa natureza. En tan só cinco horas, estes voluntarios retiraron tres camións de residuos desafiando a chuvia constante que os acompañou durante case toda a mañá.
O alcalde de Oroso, Manuel Mirás, que participou no programa durante gran parte da mañá, sinalou que “o importante desta iniciativa non é só o labor de limpeza que están a desenvolver estes voluntarios, senón que o resto de veciños e veciñas nos concienciemos da necesidade de coidar o noso entorno. Tres camións de refugallos retirados en cinco horas dan unha idea da necesidade dunha maior educación ambiental por parte de todos”.
Residuos guindados dende o coche
E é que entre os refugallos retirados ao longo desta mañá proliferaban as latas de refresco, os botellíns de plástico, os papeis, os preservativos, as caxetiñas de tabaco... “en xeral desperdicios que a xente tira polas ventanillas cando van nos seus coches por fora dos núcleos de poboación”, explica o concelleiro de Medio Ambiente, Pepe Castro, quen sinala que “durante a xornada de hoxe non atopamos nin neumáticos nin residuos voluminosos, pois estes son máis visibles e xa os retiramos a diario”. Iso non impedíu que esta mañá se retirara unha neveira nas aforas de Sigüeiro.
Se durante a xornada de hoxe os voluntarios estiveron traballando en Sigüeiro (en lugares como o polígono empresarial ou a rúa do Portiño) e en Porto Avieira, mañá venres dedicaranse á eliminación de puntos de verquido incontrolado de lixo localizados no rural orosán. A cita para todos aqueles veciños que desexen colaborar é, coma hoxe, entre as 8:30 e as 9:00 horas na praza Isaac Díaz Pardo.
O programa “Días Verdes” está organizado polo Concello de Oroso e conta coa colaboración de Vegalsa-Eroski, Frutería Mujico e Panadería-Bollería Sigüeiro, que colaboraron durante esta mañá aportando o refrixerio dos voluntarios, con empanada, froita e bebidas.
