Voluntarios de Oroso adecentarán o Camiño Inglés e eliminarán puntos de verquido de lixo durante a celebración do programa “Días Verdes”
A iniciativa desenvolverase durante as mañás do xoves e do venres.
O Concello de Oroso inicia este xoves o programa “Días Verdes”, unha iniciativa que pretende concienciar aos veciños e veciñas na necesidade de preservar a nosa natureza e adoptar actitudes que propicien un maior respecto ao medio ambiente. Así, entre as 8:30 e as 14:30 horas do xoves 14 e do venres 15 de xuño, veciños e veciñas de Oroso organizaranse por grupos para recuperar determinados tramos do Camiño Inglés ao seu paso polo municipio e eliminar varios puntos de verquido incontrolado de lixo.
O punto de encontro para todos aqueles veciños que queiran participar será a Praza de Isaac Díaz Pardo, onde ás 8:30 horas se organizarán os distintos grupos, que sairán ás 9:00 horas para os tramos seleccionados do Camiño e para os vertedoiros incontrolados. Tras unha pausa para descansar e tomar un tentempé entre 11:00 e 11:30 horas, os voluntarios voltarán á Praza de Isaac Díaz Pardo ás 14:30 horas.
Consellos a prol do medio ambiente
O programa “Días Verdes” está organizado polo Concello de Oroso e conta coa colaboración de Vegalsa-Eroski, Frutería Mujico e Panadería-Bollería Sigüeiro. Xunto á parte de recuperación activa do medio ambiente, o programa tamén inclúe a difusión entre os participantes das distintas medidas tomadas dende o Concello de Oroso na defensa do medio ambiente.
Así, informarase aos presentes da importancia de depositar o aceite de uso doméstico usado nos contedores habilitados (prazas de Isaac Díaz Pardo e de Alexandre Bóveda, avenida da Grabanxa, avenida de Compostela, na rúa Portiño e en Porto Avieira) ou da utilización do minipunto limpo na avenida de Compostela para desfacerse de pilas, tóners e baterias.. Ademais, lembrarase que a recollida de voluminosos nos domicilios realízase o primeiro sábado de cada mes e que está dispoñible un punto limpo en Sigüeiro para depositar todo aquilo que non se pode deixar nos contedores amarelo, azul, ou verde (aberto os venres, de 12:30 a 14:00 horas, e os sábados, de 12:00 a 13:30 horas).
Finalmente, o programa “Días Verdes” inclúe tamén actividades para incrementar a concienciación dos veciños sobre a importancia da reciclaxe como unha visita a Sogama, que se realizará proximamente.
