Homenaxe ás mulleres da agraria no Concello de Oroso
O Concello de Oroso uniuse onte aos actos reivindicativos polo Día Internacional da Muller, con diferentes iniciativas ao longo da xornada e unha homenaxe ás mulleres da agraria.
Pola mañá, houbo concentracións nos centros escolares en prol da igualdade e representacións teatrais, mentres que pola tarde o Concello fixo entrega dos premios do concurso de fotografía 'Muller Traballadora' e dunha placa conmemorativa á pintora Hortensia Ramos.
No acto central da xornada, celebrado na Casa da Cultura, o Concello de Oroso quixo render homenaxe ás mulleres da agraria en activo, xubiladas ou ás que nalgún momento da súa vida se dedicaron ás tarefas agrarias.
A concelleira de Muller de Oroso, María del Carmen Liste, amosou a súa satisfacción polo acto, “que pretende recoñecer o duro traballo e o esforzo diario dunhas mulleres que son o sustento dos seus fogares, hoxe é un día moi emotivo, levábamos moito tempo con gañas de facer esta homenaxe”.
O alcalde de Oroso, Manuel Mirás, uniuse aos eloxios “polo papel que estas mulleres fixeron e siguen facendo no rural, sacando adiante ás súas familias e aportando valor ao entorno no que viven”.
Coas actividades de onte, o Concello de Oroso pretendeu facer visible as realidades que a día de hoxe seguen a colocar ás mulleres en contextos de desigualdade real, a pesares dos avances experimentados en materia de igualdade de xénero co desenvolvemento de distintas disposicións legais.